पंखा सुरू, पांघरुण ओढले, दिवा लागतो उठ आता, वेळ झाली, बाबांची विरत जाणारी आरोळी मग आई हळुच आत येते पंखा बंद करुन, उठ हा आता डोक्यावरुन हात फिरवून जाते पुन्हा एकदा बाबा येउन आज नाही आहे का ग क्लास? माझ्याजवळ उभे राहुन आत आईला मोठ्या आवाजात प्रश्न. चहा घ्या, पेपर आलाय आईचे बांबाना बाहेर बोलावणे अरे पावणेसात झाले असे आई म्हणताच ओह नो! म्हणुन लवकर उठणे पंधरा मिनटात आवरताना बेसीनपाशी गरम पाण्याचा गडू असतोच. क्लास, खेळ, मित्र आटोपुन रात्री घरी आल्यावर, जेवताना बाबा विचारतात कसा दिवस, आज उशीर झाला का? मी हसत ओशाळत नाही हो, सायकल मारली जोरात. पण बाबा उद्या तुम्हीच उठवा हो लवकर, आई म्हणजे बघा.. बाबा आईकडे पाहुन जोरात हसतात, तुप आणायला ती आत जाते. -------------- सकाळी कोकराला तयार करायची ड्युटी माझी. जीव होत नाही, म्हणुन न्याहळत बसला असतो उशाशी बायको येउन म्हणते, अजुन नाही झाले का? वेळ पाहीली का? आमच्या संवादात कोकरु जाग येउन कुस बदलू पहाते. अरे वेडू जायचे की नाही शाळेत म्हणत मी कडेवर घेतो, बेसीन मधील गरम पाण्याच्या नळाखाली हात घालताना आईच्या मायेने गळा दाटून येतो, कोकरु म्हणते बाबा वेडू अरे माझा चेहरा धू, तुझे डोळे काय पुसतो