नमस्कार मिपाकरांनो,

सोशल मिडिया आता आपल्या दैनंदिन जीवनातला एक अविभाज्य घटक झाला आहे. फेसबुक, ट्विटर, व्हॉट्सॲप, इंस्टाग्राम अशा अनेक रुपात आपण त्याचा वापर करतो. इतकेच काय आपल्या सर्वांचे आवडते मिसळपाव हे संकेतस्थळही त्याचेच एक रूप आहे. इथे आपण अनेक लेखकांचे लेख, कथा, कविता, पाककृती वाचतो, त्यावर प्रतिसाद देऊन व्यक्त होतो.

सोशल मिडीयावर वावरताना आपण कित्येक प्रसंगी आपल्या भावना व्यक्त करण्यासाठी 😀 🙏 🙂 👍 😎 अशा अनेक स्मायली / एमोजींचा वापरही सढळहस्ते करत असतो. परंतु मिपावर आपल्या स्मार्टफोनवरून लिहिताना आपल्याला की-पॅड वर उपलब्ध असलेल्या एमोजींचा वापर करण्यावर मर्यादा येतात. प्रतिसादाचे केवळ शीर्षकच प्रकाशित होणे, गमतीनी किंवा उपहासाने दिलेल्या प्रतिसादामागच्या भावना वाचणाऱ्याला नीट न समजल्याने गैरसमज होणे अशा समस्या उद्भवतात. ते टाळण्यासाठी आपण :), :P, :( अशा वर्णाक्षरांचा वापर करतो.

आपल्या लेखनात किंवा प्रतिसादात आकर्षक अशा इमोजी दर्शवण्यासाठी आपल्याला HTML एमोजींचा वापर करणे सहज शक्य आहे.

सर्वप्रथम आपण HTML Emoji म्हणजे काय ते पाहू.

एमोजी ह्या दिसायला चित्र किंवा चिन्हांसारख्या असल्या तरी प्रत्यक्षात त्या UTF-8 (Unicode) ह्या वर्ण संचातल्या अक्षरांचा समूह असतात. UTF-8 (Unicode) मध्ये जगातल्या जवळपास सर्व अक्षरांचा आणि चिन्हांचा अंतर्भाव आहे. आपण आज मरठी अथवा ईतर भारतीय भाषांमध्ये जे लिहितो, वाचतो ती ह्या UTF-8 (Unicode) चीच कृपा!

आता आपण पाहूयात की अशा हजारो आकर्षक एमोजींपैकी चेहऱ्यावरील भाव आणि हाताने किंवा हाताच्या बोटांनी केलेले निर्देश अशा आपल्या नित्य वापरात असलेल्या एमोजींचा वापर आपण मिपावर कशा प्रकारे करू शकतो. HTML Emoji दर्शवण्यासाठी &, #, ; आणि इंग्रजीतील अंक व अक्षरांचा वापर केला जातो. प्रत्येक एमोजीसाठी एक अनुक्रमांक असतो आणि त्या अनुक्रमांकाच्या आधी &# आणि नंतर ; जोडावे लागते.

उदाहरणार्थ स्मितहास्य 🙂 दर्शवण्यासाठी &# नंतर 128578 आणि शेवटी ; असे टंकले कि ते स्क्रीनवर 🙂 असे दिसेल.

चेहऱ्यावरील भाव दर्शवण्यासाठी असलेल्या एमोजींच्या अनुक्रमांकांची सुरुवात 128512 ने होते. हा अनुक्रमांक लक्षात ठेवण्यास तसा सोपा आहे. 128 kbps, 256 kbps, 512 kbps, 1 Mb अथवा 128 Mb, 256 Mb, 512 Mb, 1 Gb असे शब्द आपल्या चांगलेच परिचयाचे आहेत त्यातले 128 आणि 512 हे दोन क्रमांक जोडले आणि त्याच्या आधी &# व शेवटी ; लावले कि झाली 😀 अशी हास्याची एमोजी तयार.

हाताच्या बोटांनी केलेले निर्देश (मुद्रा) दर्शवण्यासाठी असलेल्या एमोजींच्या अनुक्रमांकांची सुरुवात 128070 ने होते.

उदाहरणार्थ बोट वर केलेले 👆 दर्शवण्यासाठी
&# नंतर 128070 आणि शेवटी ; म्हणजे 👆 असे टंकले कि ते स्क्रीनवर 👆 असे दिसेल.

वरील स्मायली/एमोजींचा अनुक्रमांक वाढवत गेल्यास दिसणाऱ्या स्मायली अथवा एमोजी त्यानुसार बदलत जातात. स्मायलींसाठी 128512 ते 128580 व 129296 ते 129303 आणि हाताच्या बोटांनी केलेले निर्देश असलेल्या एमोजींसाठी 128070 ते 128080 व 129304 ते 129311 असे अनुक्रमांक आहेत. तर काही स्मायली आणि एमोजींचे क्रमांक विखुरलेले आहेत. सर्व HTML Emoji चे अनुक्रमांक जाणून घ्यायचे असल्यास ह्या पानास अवश्य भेट द्यावी.

वर उदाहरणासाठी एमोजींचा आकार मोठा केला आहे, तशा मोठ्या आकारात एमोजी दर्शवण्यासाठी छोटासा कोड आहे.
<span style="font-size:50px"> &#128578; </span> असा कोड लिहिल्यास एमोजी
🙂 अशी मोठी दिसेल.
ह्या कोड मध्ये 50px च्या जागी 100px <span style="font-size:100px"> &#128578; </span> असा बदल केल्यास ती
🙂 अशी आणखीन मोठी दिसेल.

मिपाकरांना उपयुक्त ठरू शकतील अशा नित्य वापरात येणाऱ्या काही निवडक स्मायली आणि एमोजींचे दोन तक्ते खाली देत आहे. त्यातले अनुक्रमांक थेट कॉपी-पेस्ट करून वापरता येतील.

तर मग आता एखादा धागा/प्रतिसाद आवडल्यास त्यावर व्यक्त होताना +१ ऐवजी &#128077; टंकून 👍 असा प्रतिसाद देण्याची कल्पना कशी वाटते ते जरूर कळवा 😉