मंडळी, श्रीगणेश हा चौदा विद्यांचा आणि चौसष्ट कलांचा अधिपती. या चौसष्ट कलांपैकी पाककला ही आपल्या सर्वांच्या जीवनात रोजच संबंध येणारी कला - अहो, त्यामुळेच तर उदरभरण होतं, जिभेचे चोचले पुरवले जातात (खरं तर अन्न ही माणसाची मूलभूत गरज भागवली जाते). म्हणूनच आपल्या प्रत्येक सण-उत्सवाशी कोणता ना कोणता खाद्यपदार्थ निगडित असतो - उदा., गुढीपाडवा आणि श्रीखंड, होळी आणि पुरणपोळी, दसरा आणि जिलबी, लक्ष्मीपूजन आणि अनारसे इ. अर्थातच, श्रीगणेशोत्सवाशी अतूटपणे जोडलेला पदार्थ म्हणजे बाप्पाला आवडणारा मोदक. आणि या मोदकांचे प्रकार तरी किती! उकडीचा, तळलेला, पुरण भरलेला... मात्र हे सगळे प्रकार बनवायला जरा अवघडच. म्हणूनच, अगदी सोपी कृती असलेला मोदक बनवू या. हां, हा मोदक खायचा नाहीये, तर सजावटीचा - 'ओरिगामी' मोदक आहे. ओरिगामी हीसुद्धा एक कलाच आहे, म्हणून ओरिगामी मोदकाचा 'आरासरूपी नैवेद्य' कलेचा अधिपती श्रीगणेशाला अर्पण. ऋणनिर्देश - डहाणूच्या ओरिगामी कलाकार सौ. शुभांगी करंदीकर या मोदकाच्या मूळ अभिकल्पक (Designer). मोदक तयार करण्याच्या कृतीचं चित्रीकरण करण्याची आणि ते प्रकाशित करण्याची परवानगी दिल्याबद्दल त्यांचे मन:पूर्वक आभार. आपण दोन टप्प्यांमध्ये ओरिगामी मोदक बनवू. पहिला टप्पा आहे 'प्रिलिमिनरी' हा मूलभूत आकार बनवणं. यासाठी आपण 'कामी' (एका बाजूने रंगीत, दुसऱ्या बाजूने पांढऱ्या रंगाचा चौरस कागद) वापरू.