एक कप चहा - भाग २ !!

एक कप चहा - भाग २ !!

धरेला मोहरून टाकणारं
पावसाचं पाणी ,
चिंब भिजलेल्या मातीचा
तो गोड सुगंध ,
आकाशाला इंद्रधनूची माळ घालून
डोकावणारा भास्कर ,
मग कापूस पिंजून ठेवल्यासारखे
शुभ्र ढग ...
असंच बनतं विश्व .....

बहरलेला ऋतू आणि आलं घातलेला ....एक कप चहा !!

अनमोल रत्नांना सामावलेला
अथांग समुद्र ,
फक्त मनात साठवता येतील
अशी पक्षांची गोड गाणी ,
कृत्रिम जगालाही मागे टाकणारे
अप्रतिम निसर्ग सौंदर्य ,
दिव्यांचा झगमगाट असून सुद्धा
भुरळ घालणारा मंद चंद्र प्रकाश .....
असंच असतं सुख ....

क्षण क्षण निसटलेला आणि तृप्त करणारा ...एक कप चहा !!

सुख आणि दु:ख डोळ्यात
पाणी आणतात खरे ,
राव असो वा रंक
साखरेचा गोडवा चाखतात खरे ,
फिके असू की गडद
फुलांचे रंग मोहरून टाकतात खरे ,
आणि बेदाग पांढऱ्या रंगाचे
पावित्र्य ते खरे ....
असंच असतं जीवन .....

निर्जीवातला जिवंतपणा आणि तयार झालेला ....एक कप चहा !!

धबधबा पाहताना कधी आपण
धुक्यात हरवतो ,
गोड बातमी ऐकतानाही
आनंदाश्रू कोसळतो ,
आभाळ रंगीत करूनही
सुर्य मावळलेला असतो,
रंगांच्या छटा खुलवण्यासाठी
घेतलेला कॅनवास मात्र पांढराच असतो ....
असंच असतं हे आयुष्य ....

गच्च भरलेला रिक्तपणा आणि पोटात ढकललेला....एक कप चहा !!