शांतरस

आला हिरवा श्रावण आषाढ सरून जाई
झोक्यावर झुलायाची माहेराची आटवण येई ||धृ||

बाच्या मळ्यामंदी पिंपळाला बांधला झोका
पुढं जाई मागं येई चुके काळजाचा ठोका
पति संग बांधलं मन, इथं झुल्याला जागा न्हाई
झोक्यावर झुलतांना माहेराची आटवण येई ||१||

भाऊ मुद्दामच बांधे झोका वरच्या फांदीला
सुर जाई लांब मोठा जवा राही मैत्रीण जोडीला
इथं मोठ्या शेहरात नावालाही सोबत न्हाई
झुल्यावर झुलतांना माहेराची आटवण येई ||२||

बरोबरीच्या पोरींसंगे खेळायाची सागरगोटी
जिंकायाची परत्येक ढाय राही मोटी बहिन पाठी
भादव्यात नेमानं भजायाची गुलाबाई
झुल्यावर झुलतांना माहेराची आटवण येई ||३||

सहावा सरून काल सातवा लागला
बाळराजाच्या चाहूलीचा गोळा पोटात आला
माझ्या घरीही येईल झोका, दोन महिनं वाट पाही
झुल्यावर झुलतांना माहेराची आटवण येई ||४||

आला हिरवा श्रावण आषाढ सरून जाई
झोक्यावर झुलायाची माहेराची आटवण येई ||धृ||

- पाषाणभेद (दगडफोड्या)
२६/०७/२०१०

घंटा वाजली सुटली शाळा
पाउस आला पाउस आला ||

दप्तराचे मोठे ओझे झाले
वह्या पुस्तके भिजून गेले
खांद्यावरतून फेकून देवू
भरभर सारे घरी पळा
पाउस आला पाउस आला ||

पुर आलेल्या ओढी जावू
पुलावरूनी पुर पाहू
उगाच जावूनी काठावरती
ओढ पाण्याची पाहू चला
पाउस आला पाउस आला ||

छत्री बित्री नकाच घेवू
चिंब भिजाया घरीच ठेवू
चिखलाचे सारे पाणी खेळा
पाउस आला पाउस आला ||

* मिपा वरील हे माझे २०० वे टंकन होते. म्हणजे २/३ लेख उडालेले आहेत. तरीही हा २०० वा लेख/कविता होती. आपण प्रेमाने लेख/कविता वाचल्यात. वेळात वेळ काढून प्रतिक्रिया दिल्यात. आपल्या सगळ्यांचे मनापासून आभार.

- पाषाणभेद (दगडफोड्या)
२५/०७/२०१०

नवरा आहे मुलं आहेत
घरदार भरलेलं आहे
तरीही मन रमत नाही
अरे देवा मी काही सुखी नाही ||

अंधेरीला प्लॅट आहे पाली हिलला बंगला आहे
सजवलेला एसी बेडरूम आहे
वॉटरबेडशिवाय मला झोप येतच नाही
अरे देवा मी काही सुखी नाही ||

नोकर आहे चाकर आहे
स्वयंपाकासाठी मावशी आहे
नावाला भाजीची फोडणी मी देई
अरे देवा मी काही सुखी नाही ||

टिव्ही आहे डिव्हीडी आहे
झालंच तर मल्टीफ्लेक्स मुव्ही आहे
तरीही करमणूक कशी नाही
अरे देवा मी काही सुखी नाही ||

पिझ्झा आहे बर्गर आहे
फाईव्ह स्टार डिनर आहे
तरी आजकाल चांगलचुंगल मी खातच नाही
अरे देवा मी काही सुखी नाही ||

तर्‍हेतर्‍हेचे कपडे आहे निरनिराळे ड्रेस आहे
ब्युटीपार्लरची मेंबर आहे
तरी फॅशन पुरी होतच नाही
अरे देवा मी काही सुखी नाही ||

एक दोन नाही तीन नाही
चार चार चाकी गाड्या आहेत
कोणत्या गाडीत बसावं कळतच नाही
अरे देवा मी काही सुखी नाही ||

देव आहे देवी आहे
आध्यात्मिक संत आहे
तरी कोणा बुवा महाराज भजू समजतच नाही
अरे देवा मी काही सुखी नाही ||

अर्धा पेला भरलेला अर्धा रिकामा आहे
आहे ती परिस्थिती काय वाईट आहे
तुला पदरचे सुख उमगत नाही
अरे पाषाणा तू दु:खी नाही ||

- पाषाणभेद (दगडफोड्या)
२४/०७/२०१०

फाल्गून सरला चैत्री पाडवा आला
नव्या वर्षाची गुढी उभारू चला ||धृ||

नऊवार साडी चौरंगी खण
काठी धुवून टाका बांधून
लिंबाचा पाला हारकड्याने
सजवू धजवू तिला
नव्या वर्षाची गुढी उभारू चला ||१||

शुभमुहूर्त असे चैत्र शुद्ध प्रतिपदेचा
शुभ काळ असे नव्या कार्यरंभाचा
पाने आंब्याची फुले झेंडूची घेवून
तोरण लावू दाराला
नव्या वर्षाची गुढी उभारू चला ||२||

धरती नटली चैत्रपालवी
घरात सजली गृहलक्ष्मी
विसरा १ जानेवारीच्या वेड्या जल्लोशाला
सण मराठी वर्षारंभाचा आला
नव्या वर्षाची गुढी उभारू चला ||३||

- पाषाणभेद (दगडफोड्या)
२२/०७/२०१०

पाऊस आला पाऊस आला पडू लागल्या धारा
थेंबांच्या नक्षीला साथ द्याया धावे अवखळ वारा ||

अलगद हलक्या सरी येवूनी सुरू होतसे वर्षाव
वेग वाढूनी जोर येतसे धारेला नसतो ठाव
क्षणात ओली होई धरती पडता असंख्य धारा ||१||

नभातून तुषारांचे पडती बारीक बारीक थेंब
धरती होईल हिरवी अवघी लेवूनी हिरवे कोंब
हिरवाईची किमया होईल निसर्ग बदलेल सारा ||२||

- पाषाणभेद
१७/०७/२०१०