पनीर उत्तपा

भाजीसाठी काही नाही त्यामुळे मी काल डोस्याचे पीठ बनवले आहे, सोबत बटाट्याची भाजी करणार असे आईने चहा पिताना सांगितले. डोसा खायची इच्छा नव्हती आणि थोडा वेळही होता म्हटल चला कांदा/चीज उत्तपा बनवूया. बघितलं तर दोनच छोटे कांदे होते, मग त्यात टोमॅटो टाकायचे म्हणुन फ्रिज उघडला तर पनीर दिसले. आणि म्हटल चला आजे "पनिर उत्तपा" बनवुन पाहू. साहित्यः - कांदे २ (तेवढेच होते) - टोमॅटो २ - पनीर १०० ग्रॅम (अंदाजे) - हिरव्या मिरच्या २ - चाट मसाला १ चमचा - कोथिंबिर - मिठ कापाकापी नंतरचा फोटो सर्व एका भांड्यात मिक्स केलं तव्यावर दोन डाव पीठ टाकुन गोलाकारात पसरवण्याचा प्रयत्न केला व त्यावर थोड मिश्रण टाकलं आणि गॅस सुरु केला. एक मिनिट गॅस मोठाच ठेवला व नंतर कमी गॅसवर दोन मिनिट ठेवलं. नंतर पलटुन दुसर्‍या बाजुने दोन मिनिट ठेवला. तयार झाल्यानंतर त्यावर थोड तूप टाकलं आणि... कांदा / पनीर / टोमॅटो असल्याने याला कुठला उत्तपा म्हणावा ?