कर्ण आणि कृष्ण कर्ण व्हावे की कृष्ण व्हावे? कृष्ण व्हावे की कर्ण व्हावे? जे आपले असते तेच द्यावे की द्यावे तेही आपले रहावे? रक्तगर्भी वारसा जखमेचा सांभाळून ठेवावा उरात की, स्वतःच्या आशेचेच कवच स्वतःच्या जिवाला शिवावे? परशुरामाचे शाप आळवत खेचावी प्रत्यंच्या रागावून, की कमलकरांनी जग जिंकून पुन्हा कुणाचे रथ हाकावे? तेजाळल्या दुखऱ्या व्यथांचा कुणी सुयोधन बाजार मांडेल की त्याची वाट पाहण्यापेक्षा आपले पार्थ आपण शोधावे? अनाहूत स्वयंवराचा अपमान आयुष्याशी जुगारात तोलावा, की कडूजहर विष पचवूनही कालियाच्या फण्यावर नाचावे? नियतीच्या सारिपाटावर दान कधी असे पडेल कधी तसे, मस्तकी डोंब पाजळत फिरावे की राख होऊन पुन्हा हसावे? कर्ण व्हावे की कृष्ण व्हावे? कृष्ण व्हावे, हो, कृष्णच व्हावे कधी कुणाचे कवच व्हावे, कधी कुणाचे कुंडल व्हावे!!