कांद्याचा भात

Primary tabs

रेवती's picture
रेवती in अन्न हे पूर्णब्रह्म
12 Sep 2012 - 6:48 am

साहित्य: तांदूळ १ कप, उभा जाडसर चिरलेला कांदा अडीच कप , हरभरा डाळ १ टेबलस्पून , मोहरी अर्धा टीस्पून, मेथ्या एक अष्टमांश टीस्पून, हिंग एक अष्टमांश टीस्पून, हळद पाव टीस्पून, कढीलिंबाची एक काडी, धणेपूड एक टीस्पून,
जिरेपूड अर्धा टीस्पून, काळीमिरीपूड पाऊण टीस्पून, लिंबूरस १ टेबलस्पून, तांदळाच्या दुप्पट आधणाचे पाणी, थोडे तूप, कोथिंबीर व खोबरे, मीठ.

कृती: तांदूळ धुवून निथळत ठेवावेत. कांदा जाडसर चिरावा. फोडणीचे साहित्य तयार असावे. पाणी तापण्यास ठेवावे. पातेल्यात नेहमीपेक्षा थोड्या जास्त तेलाची मोहरी, हिंग, हळद, मेथ्या घालून फोडणी करावी. कढीलिंब व हरभरा डाळ घालून थोडे परतावे. त्यात चिरलेला कांदा घालावा व परतावे. त्यास एक वाफ आणून धुतलेले तांदूळ घालावेत व हलक्या हाताने परतावेत. तांदळाचा रंग किंचित बदलला की आधणाच्या पाण्यापैकी निम्मे पाणी त्यात घालावे. नंतर धणे, जिरे व मिरेपूड, मीठ घालावे. पाणी आटत आल्यानंतर उरलेल्यापैकी निम्मे पाणी घालावे व झाकून शिजू द्यावे. मधेच एक दोनदा हलवावे. त्यावेळी लिंबूरस घालावा. लागल्यास आणखी पाणी घालून मंद आचेवर भात अगदी मऊ व मोकळा शिजायला हवा. किंचित पाणी त्यात असतानाच साजुक तूप कडेने सोडून झाकून ठेवावे व आंच बंद करावी. वाफ मुरल्यावर भात वाढावा. वरून ओले खोबरे व कोथिंबीर घालून उपयोगात आणावा. याबरोबर आमसुलाचे गोडसर ताक द्यावे.

टीपा: १. तांदूळ कोणत्याही प्रकारचा वापरता येतो.
२. कांदे शिजून कमी होत असल्याने जास्त घ्यावेत व जाड चिरावेत म्हणजे शिजून गाळ होत नाही.
३. काळी मिरीचा वापर तब्येतीस झेपेल त्याप्रमाणे करावा.
४. पाणी लागेल तसे थोडे थोडे घालावे.
५.यात गूळ, साखर घालू नये. कांद्याचा गोडसरपणा पुरतो.
६. आमसुलाचे गोडसर ताक करण्यासाठी, नेहमीप्रमाणे ताक करून घेणे. त्यात आमसूलाचे पाणी अथवा आगळ घालावे. आगळ गोड असल्याने साखर नाममात्र घालावी. फक्त आमसूलाचे पाणी /अर्क असल्यास साखरेचे प्रमाण वाढवावे. कोथिंबीर घालावी. मीठ, हिरवी मिरची, आले व एक लसणाची पाकळी यांचे वाटण घालून ताक तयार होते. त्यास फोडणी नाही.

पावसाळी हवेत या भाताचा आस्वाद चांगल्या प्रकारे घेता येतो. एखाद्या पावसाळी संध्याकाळी, सौ. आई हा भात करीत असे.

074

प्रतिक्रिया

यशोधरा's picture

12 Sep 2012 - 7:51 am | यशोधरा

सोपी, मस्त पाकृ. करुन पाहीन.
हे आमसुलाचे ताक भारी प्रकार वाटतो आहे. ते आजच करेन. ;)

कांद्याचा भात कांद्याच्या पोह्यांसारखा का दिसतोय.? :)

साधी आणि सोप्पी पाक क्रुती .
मस्त :)

गवि's picture

12 Sep 2012 - 10:25 am | गवि

साधा असला तरी टेस्टी असेल याची खात्री वाटते आहे. साधेच पदार्थ बर्‍याचदा खूप टेस्टी असतात.

बादवे. तंबिटाचे लाडू ?!

तर्री's picture

12 Sep 2012 - 10:37 am | तर्री

साधीच पाकृ + नमुनेदार सजावट + उत्कृष्ठ फोटो = जिव्हा + पोट + मेंदू चे समाधान !

स्पा's picture

12 Sep 2012 - 10:49 am | स्पा

मस्त वाटतेय
करून बघणेत यील

प्रभाकर पेठकर's picture

12 Sep 2012 - 10:50 am | प्रभाकर पेठकर

वा.. मस्तं पाककृती. छायाचित्र तर, एखाद्या इंग्रजी मासिकातील छायाचित्राप्रमाणे, एकदम आकर्षक आहे.

प्रा.डॉ.दिलीप बिरुटे's picture

12 Sep 2012 - 1:55 pm | प्रा.डॉ.दिलीप बिरुटे

छायाचित्र तर, एखाद्या इंग्रजी मासिकातील छायाचित्राप्रमाणे, एकदम आकर्षक आहे.

छायाचित्राला विशेष गुण दिले आहेत. सजावट, छायाचित्र, छायाचित्रात येणारी भांडीकुंडी हे जालीय पाककृत्यांचे आत्मे असतात. यांच्यावर बर्‍याचदा पाककृत्यांचे यश असते. मलाही लै पाककृत्या टाकायच्या असतात पण आमची भांडीकुंडी साली आडवी येतात. :)

-दिलीप बिरुटे

एस's picture

12 Sep 2012 - 10:40 pm | एस

मलाही लै पाककृत्या टाकायच्या असतात पण आमची भांडीकुंडी साली आडवी येतात.

डिट्टो! ;)

इरसाल's picture

15 Sep 2012 - 10:01 am | इरसाल

जमल्यास कुंडीही बदला ;)

मी मूळची कानडी असले तरी हा टारगटपणा केला नव्हता. ;)
हे मराठी संस्थळ असल्याचे लक्षात ठेवले होते. ;)

हारुन शेख's picture

12 Sep 2012 - 11:14 am | हारुन शेख

फोटो अतिशय सुंदर आलाय. भातही नक्कीच खूप चविष्ट असणार.

आमसुलाचं ताक करुन बघते उद्या.

स्नेहांकिता's picture

12 Sep 2012 - 11:35 am | स्नेहांकिता

अगदी वेगळा प्रकार वाटतोय भाताचा. चवीची कल्पना केल्यावर तोंपासु.
रेवतीतै, अगदी बारीक सारीक तपशील दिल्याबद्दल धन्स.

ऋषिकेश's picture

12 Sep 2012 - 11:39 am | ऋषिकेश

अरे वा! प्रथमदर्शनी तरी आकर्षक तरीही सोपी पाकृ वाटते आहे

इरसाल's picture

12 Sep 2012 - 11:52 am | इरसाल

मश्त मश्त पाकृती.

( वस्तुंचे प्रमाण अष्टमांश हा गेलेल्या गोकुळष्टमीचा प्रभाव काय ?)

कवितानागेश's picture

12 Sep 2012 - 12:09 pm | कवितानागेश

मला वाटते, हरभर्‍याच्या डाळी बरोबर शेंगादाणे, मटार हेपण छान लागतील.

खुशि's picture

12 Sep 2012 - 12:23 pm | खुशि

कान्देभात छानच.आमसुलाचे ताकही चविष्ट.करुन बघते दोन्ही पदार्थ.

गणपा's picture

12 Sep 2012 - 12:40 pm | गणपा

मस्तंच.
आमसुलाचे ताक हां नवाच प्रकार ऐकला.
चवीत फरक असला तरी दिसायला सोलकढी सारखंच दिसत असेलं नै?

आमसुलाचं ताक करुन पहावं असा विचार आहे... भाताबद्दल लई भारी, सध्या एवढंच.

आमच्या सोलकढीतच मुळात ताक/दही असते. त्यामुळं आमसुलाचं ताक हा प्रकार किती कातिल असू शकतो याची कल्पना आहे! :)

पाकृ झकासच!

श्रावण मोडक's picture

12 Sep 2012 - 2:45 pm | श्रावण मोडक

कांदेभात आवडला. आमसुलाचे ताकही उत्तम.
न खाताच आलेली ही प्रतिक्रिया आहे!

सानिकास्वप्निल's picture

12 Sep 2012 - 3:16 pm | सानिकास्वप्निल

कांदेभात आवडला , वेगळा प्रकार आहे
करून बघेन :)
आमसुलाच्या ताकाची पाककृती खासकरुन जास्त आवडली
रंगही छान आलाय आणी फोटो तर खल्लास :)

अत्रुप्त आत्मा's picture

12 Sep 2012 - 3:41 pm | अत्रुप्त आत्मा

झकास................................................................................! :)

प्रचेतस's picture

12 Sep 2012 - 4:07 pm | प्रचेतस

मस्त.

चिंतामणी's picture

12 Sep 2012 - 4:21 pm | चिंतामणी

पण एक दूरूस्ती करायची आहे.

"आगळ गोड असल्याने साखर नाममात्र घालावी. ".

आगळ गोड नसते. त्यात साखर नसतेच. साखर कोकम (सरबतासाठीचे) मधे असते. आगळात फक्त मिठ आणि कोकमचा अर्क असतो.

आपले म्हणणे बरोबर आहे पण आजकाल सरबतासाठी जे कॉन्सट्रेट मिळते त्यावर आगळ छपल्याकारणाने माझा दोनदा गोंधळ उडाला होता. पाकृ टंकतानाही मी इथेच अडले पण बाजारात ज्या नावे मिळते तसे लिहिल्यास वाचकांना सोपे जाईल म्हणून लिहिले व अर्काचा उल्लेखही करून ठेवला.

छापणा-याने चुकीचे छापले असणार.

असो.

इथे सविस्तर माहिती मिळेल.

प्रभाकर पेठकर's picture

12 Sep 2012 - 8:41 pm | प्रभाकर पेठकर

चिंतामणींशी १००% सहमत.

कोणी 'कोकम सरबताचा' अर्क (अमृत कोकम) 'आगळ' म्हणून विकत असेल तर ती गिर्‍हाईकाची दिशाभूल आहे. 'ग्राहक मंचा'वर तक्रार देता येईल.

मस्तच पाकृ... थोडासा वर्‍हाडी भाता सारखाच आहे... करुन बघायला पाहिजे.

परिकथेतील राजकुमार's picture

12 Sep 2012 - 4:43 pm | परिकथेतील राजकुमार

भाताची वेगळी पाकृ एकदम आवडेश.

पैसा's picture

12 Sep 2012 - 5:49 pm | पैसा

फोटो फारच सुरेख! आणि सोप्पी पाकृ. नक्की करून बघेन. मला आधी वाटलं की कच्चा कांदा घालून एक उन्हाळ्यासाठी थंड भाताची पाकृ आहे तशी की काय! पण हा भात एकदम वेगळाच निघाला.

डोळ्यांच समाधान झाले.. आता पोटाचे समाधान कोण करणार?

मायला मला पण मनोबासारखे प्रश्न पडायला लागलेत की काय.. :D

जाई.'s picture

12 Sep 2012 - 10:04 pm | जाई.

झकास

अभ्या..'s picture

12 Sep 2012 - 11:54 pm | अभ्या..

पाकृ भारी. फोटो भारी. टेस्ट पण भारीच असणार पण..
रेवतीतै मी कांदा खातच नाही हो. :-(
कोबी किसून ट्राय करू का?

कोबी, फ्लॉवर, मटार असे ट्राय करून बघा. एकत्र किंवा वेगवेगळे.

आमसुलाच ताक माहिती आहे. अगदी न सांगता खाल्ल तर सोलकढीच.

बाकि भात अन सजावट अतिशय सुरेख. आज करुन पाहिला जाइल.

कच्ची कैरी's picture

13 Sep 2012 - 7:57 am | कच्ची कैरी

मस्त पाककृती !!! सोलकढी तशी माझी आवडतीच आहे म्हणुन आमसुलाचे ताकही करुन बघेल तेही आवडेल अशी खात्री आहे :)

प्रीत-मोहर's picture

13 Sep 2012 - 10:27 am | प्रीत-मोहर

सोलकढी!!!! आजच करण्यात येईल.

श्रावण मोडक's picture

13 Sep 2012 - 1:17 pm | श्रावण मोडक

किती थापा माराव्यात माणसानं!

नंदन's picture

13 Sep 2012 - 2:07 pm | नंदन

भात आणि कढी पाककृतीतच असल्याने एक चपखल म्हण आठवली :)

श्रावण मोडक's picture

13 Sep 2012 - 2:30 pm | श्रावण मोडक

नेमकी, मार्मीक. एकारान्तांना शोभणारी. ;-)

निवेदिता-ताई's picture

14 Sep 2012 - 8:29 am | निवेदिता-ताई

सुंदरच..............नक्की करुन पाहिन......आजच.........:)

फोटुच इतका सुंदर आलाय तर भात देखील झकास असणारच ! ;)

याबरोबर आमसुलाचे गोडसर ताक द्यावे.
हा प्रकार कधी प्यायला नाहीये,ट्राय मारायला हवा ! :)

शुचि's picture

14 Sep 2012 - 11:10 pm | शुचि

सही..... आमच्या इथे सिंची आमसुले मिलत नाहीत :(

सर्व प्रतिसादकांचे आभार.
गवि, तंबीटाच्या लाडवांचे लक्षात आहे.
किस्ना, भाताचा फोटू पोह्यांसारखा वाटतोय ती माझ्या फटुग्राफीची कमाल समजावी. ;)
फोटो टाकताना वापरण्याची भांडीकुंडी याबाबत लेख लिहिण्यास सानिकाताईंना प्रोत्साहन द्या.
ज्यांनी चव न घेताही पाकृचे कौतुक केले त्यांना घरी आमंत्रण आहे. भात करून वाढला जाईल.
शुचितै, आमसुले इंड्यातून आणावीत नाहीतर पराकडे चौकशी करावी. तो अश्या वस्तू शोधत फिरतो. ;)
पेठकरकाकांनी व चिंतुकाकांनी आगळ व अर्क यावर चर्चा केल्याने आता लक्षात ठेवते.

प्यारे१'s picture

15 Sep 2012 - 2:08 am | प्यारे१

अSSSSSSब्ब्ब्ब!
पोट्च भर्‍या एकदम!

अविकुमार's picture

15 Sep 2012 - 4:53 pm | अविकुमार

लई झ्याक दिसुन र्हायली ती कढी बगा!!!

अनन्न्या's picture

19 Nov 2012 - 6:32 pm | अनन्न्या

आगळ म्हणजे कोकमच्या सालात मीठ मिसळून काढलेला अर्क आणि गोडसर असते ते कोकम सिरप ज्यापासुन सरबत केले जाते. आगळ सोलकढी साठी वापरतात. आगळ नसेल तर आमसूले पाण्यात भिजत घालून तो अर्क वापरावा.

जयवी's picture

21 Nov 2012 - 1:25 pm | जयवी

मस्तच !!
ए याला "रावणभात" म्हणतात का गं ? माझ्या सासूबाई सुद्धा असा भात करायच्या.

नाही. रावणभात हा खूपच तिखट असावा असे वाटते. हा किंचित मसालेदार असतो.
धन्यवाद.