शब्द,शपथा,भाव,कविता..बेअसर झाले
बोललो नाही कधी पण दुःख तर झाले!
चेहऱ्यावरची न रेषा एकही ढळली
वार काही काळजाच्या खोलवर झाले!
लागला धक्का असा अन् सांडला पेला...
पान दुष्काळी कथेचे ओलसर झाले!
या इथे,खेळायची ती सूर-पारंब्या
हेच अंगण..आज त्याचे माजघर झाले!
तू दिलेली डायरी अन् पीसही जपले
डायरी आकाश माझे..पीस पर झाले!
व्हायचे असतेच ते होवून जाते पण
नेमके कळले कुठे जे आजवर झाले?
—सत्यजित
प्रतिक्रिया
29 Mar 2017 - 8:14 pm | संदीप-लेले
आवडली
1 Apr 2017 - 12:38 am | सत्यजित...
धन्यवाद संदिपजी!
29 Mar 2017 - 11:21 pm | अत्रुप्त आत्मा
वाह रे मभाया... !
1 Apr 2017 - 12:41 am | सत्यजित...
माफ करा,पण मभाया म्हणजे काय?