आज पहिला आंतरराष्ट्रीय योग दिवस आहे. मिपावर वावरणारा एक सामान्य योग प्रशिक्षक या नात्याने सर्वांना या दिवसाच्या हार्दिक शुभेच्छा. २१ जून हा आपल्यासाठी सर्वात मोठा दिवस आणि सर्वात लहान रात्र असणारा दिवस म्हणुन परिचित आहेच, आता या दिवसाला आणखी नवी ओळख मिळाली आहे. २७ सप्टेंबर, २०१४ ला संयुक्त राष्ट्र संघाच्या सर्वसाधारण सभेत भाषण करतांना भारताचे पंतप्रधान श्री. नरेंद्र मोदी यांनी योगाला या प्रकारचा दर्जा देण्याची मागणी केली होती आणि अल्पावधीतच (डिसेंबर, २०१४) संयुक्त राष्ट्र संघाच्या सभासद असणा-या १९२ देशांपैकी १७७ देशांनी या ठरावासाठी सहप्रायोजकत्व स्वीकारले. हा एक विक्रम आहे यापूर्वी अशा प्रकारच्या ठरावाला कधीही एवढ्या मोठ्या प्रमाणात स्विकृती मिळाली नव्हती. ही सर्वमान्यता परंपरेने चालत आलेल्या योग विद्येला आहे. तुम्हाला मला सर्वांना याचा अभिमान वाटावा असा हा दिवस आहे. आज भारत सरकारच्या आमंत्रणावरुन जगभरात होत असणा-या योग प्रशिक्षणाच्या कार्यक्रमाचा एक भाग म्हणून भारतापासून हजारो कि.मी दूर जगाच्या दुस-या कोप-यात असणा-या आणि फारशा परिचयाच्या नसलेल्या 'हैती' या देशात योगाचे धडे देण्याची आणि भारताचे प्रतिनिधीत्व करण्याची संधी मिळाली. क्युबाच्या जवळ असणा-या केरेबियन समुद्राच्या किना-यावरील या देशातील अनुभव फारच रोचक आहेत.