२० मिनिटात होणारा सर्किट ट्रेनिंगचा व्यायाम बरीच जणं करतायत असं कळलं :) तर, त्या २० मिनिटाच्या व्यायामाचं जे प्रिन्सिपल म्हणजे तत्व होतं, की वेळ कमी, आणि त्यात व्यायाम जास्त प्रभावी; तेच तत्व साधणारा आणखी एक व्यायामप्रकार तुम्हाला सांगावा म्हणतो. असंच `हे वाच ते वाच' करताना मला कळलेल्यांपैकी ही एक गोष्ट. या व्यायामाचं नाव, `बर्पी'. हा व्यायामाचा प्रकार नाही; तर एरोबिक प्रकारात आणि काहीसा प्लायोमेट्रिक प्रकारात मोडणारा एक व्यायाम आहे. पण हा व्यायाम सॉलिडा प्रभावी आहे. सर्वांगाला व्यायाम देतानाच कार्डिओ म्हणजेच ह्रुदयाला व्यायाम देणारा, किंवा स्टॅमिनाचाही कस लावणारा असा हा व्यायाम, `बर्पी'. केवळ हाच व्यायाम आणि जोडीला स्ट्रेचिंग, किंवा काही योगासनं, असाही दिनक्रम ठेवून तुम्ही तुमचं फिटनेस चं उद्दिष्ट साध्य करू शकता. हे काय असतं ब्वा, कसं करायचं?... ते असं. १. ताठ उभं रहा. नजर समोर. २. पुढे खाली वाकून पावलांच्या बाजूस (अगदी बाजूस नसले तरी किंचित पुढे, फार नको) दोन्ही हात ठेवा. (इथे गुडघ्यात वाकल्यास हरकत नाही.) ३. दोन्ही पाय मागे फेकत `पुशअप पोजिशन' मधे या. ४. एक पुशअप करा. (न जमल्यास ही स्टेप वगळा) ५. पाय पुन्हा उडी मारून हाताजवळ आणा. (स्टेप २) ६. हात उंच करत बसल्या स्थितीतून उडी मारून स्टेप १ च्या स्थितीत या. तूनळी वर याचे अनेक व्हिडियो मिळतील, आंतरजालावर बरीच माहिती मिळेल. हा सुद्धा साधारण सगळ्या वयोगटांना जमू शकणारा व्यायाम आहे. तेंव्हा वेळ कमी असेल, फिटनेस तरीही महत्वाचा असेल, तर बर्पीसाधना करायला हरकत नाही. हमखास फरक जाणवेल, तुम्हाला आणि पर्यायाने इतरांनाही. एक बर्पी चॅलेंज म्हणून प्रकार करतात काही जण. १ बर्पी पासून सुरुवात करून रोज १ अशा प्रकारे संख्या वाढवत न्यायची आणि १०० दिवसा अखेर तुम्ही न थांबता एका दमात १०० बर्पी करायच्या. .... ऐकायला कदाचित कठीण वाटेल पण ट्राय करायला हरकत नाही ना! १०० नाही ५० तरी होतीलच एका दमात. मुद्दा काय, आपला स्टेमिना आहे त्यापेक्षा चांगल्यापैकी वाढला पाहिजे... त्यातच विजय आहे..