सूचना: या पाककृतीचा आणि खाण्याचा संबध आहे .. गाण्याशी काहि संबध नाहि.. मी जेंव्हा नविन लग्न होऊन सासरी आले तेंव्हा कोकणी सासरी आपला कसा निभाव लागणार हा मोठ्ठा प्रश्न माझ्यासमोर होता. पण दुधात साखर मिसळावी तशी नविन घरी कधी रुळले ते कळलच नाही. जेवण करायची खूप आवड सुरवातीपासून असल्याने आईहि खूष होत्या. मलातर कोकणी पाककृतीच्या रुपात मोठा खजिना हातात लागल्यासारखे झाले. त्या सुरवातिच्या दिवसात आईंच्या हाताखाली शिकलेल्या पदार्थांपैकी एक बटाट्याचे सॉंग. आज नवरोंबाचा वाढदिवस म्हणून खास बनवली ही भाजी. बनवायला अगदि सोपी. साहित्य : ४ उकडलेले बटाटे १ बारीक चिरलेला कांदा ३ लहान चमचे तेल चविपुरता मीठ वाटण : ६-७ लाल मिरच्या लिंबाएवढि चिंच मुठभर धणे कृती : १. मिरच्या, चिंच आणी धणे थोड पाणी घालून बारीक वाटून घ्यावे. २. भांड्यात तेल गरम करून कापलेला कांदा चांगला गुलाबी होईपर्यंत परतून घ्यावा. ३. कांदा गुलाबी झाल्यावर वाटलेला मसाला टाकून थोडे पाणी घालुन थोडे शिजवून घ्यावे. ४. उकडलेले बटाटे बारीक कापून घ्यावे. ५. शिजलेल्या वाटणात बटाटे घालावे. ६. चविपुरता मीठ घालावे. ७. थोडे पाणी घालून झाकून ६-७ मिनीट शिजवावे. ८. ताक-भात, पापड, दहि-काकडीची कोशिंबीर आणि लोणच्या सोबत आपल्या आवडत्या व्यक्तिला करुन वाढावे.