इथे ताल चुकलेला तिथे सूर दुभंगला सुखासुखी जमते का सम साधण्याची कला?

शब्द भिडता शब्दाला अर्थ बापडा खंगला कवितेला स्वच्छ, स्पष्ट अंत दिसला आपला

रंग बेरंग झालेला विद्ध अशक्त कुंचला फलकाची मूक खंत 'म्हणू नका चित्र मला!'

माती बोले पाषाणाला 'धातू वेठीस धरला मूळ रूपाचा विध्वंस अशी कशी शिल्पकला?'

जन्म चुकांचा काफिला अंधपणात चालला कौशल्य ना कारागिरी तरी सार्थकी लागला?

जीव आला, जीव गेला श्वास घेतला, सोडला फक्त भाराभर चिंध्या हाच ऐवज उरला