विळखा -५

सुबोध खरे's picture
सुबोध खरे in जनातलं, मनातलं
2 Aug 2019 - 7:05 pm

विळखा -५
आज आमच्या आईला अति दक्षता विभागातून तिच्यासाठी खास खोलीत (स्पेशल रुम) आणण्यात आले. तिच्या शल्यक्रियेत आणि शल्यक्रियेच्या नंतर काय काय गुंतागुंती होऊ शकतील याची मला पूर्ण कल्पना होती. यामुळे काल रात्री सुद्धा मी शांतपणे झोपू शकलो नव्हतो. गेले काही दिवस चिंतेमुळे झोप सुद्धा पहाटे लवकर मोडत असे.आज पहाटे सुद्धा पाच वीस ला जाग आली आणि नंतर झोप लागली नाही ( अन्यथा मी सकाळी साडे सातला फार कष्टाने उठणारा माणूस आहे)

सुदैवाने यातील कोणतीही गंभीर गुंतागुंत होता शल्यक्रिया सुरळीत झाली आणि तिची प्रकृती झपाट्याने सुधारत आहे हे पाहून आज मी जास्त शांत पणे हे लिहू शकतो आहे.
याचे एक महत्त्वाचे कारण म्हणजे आमच्या आईची निर्धास्त आणि सकारात्मक वृत्ती.

अर्थात शल्यचिकित्सक आणि त्यांचे सहाय्यक आणि एकंदर टाटा रुग्णालयाचे कर्मचारी यांचे फार मोलाचं साहाय्य आहे यात शंकाच नाही.

या प्रकरणातून घेण्याजोग्या काही गोष्टी.

१) कोणताही रोग असाध्य नाही आणि कर्करोग झाला म्हणजे सगळं संपलं असा तर मुळीच नाही.

२) कोणतेही संकट आले तर त्यावर शांत चित्ताने उपाय शोधणे आवश्यक आहे. आमच्या घरातील कोणीही कुठे नवस केला किंवा देव पाण्यात ठेवले किंवा महा मृत्युंजयाचा लक्ष जप केला असे अजिबात झाले नाही. सद्सदबुद्धी आणि तारतम्य ठेवणे आवश्यक आहे. कर्करोग आहे तर त्यावरील सर्वोत्तम उपाय कुठे मिळतील याचा शोध घेत शेवटी टाटा हीच संस्था आम्हाला योग्य वाटली. ( याचा अर्थ असा अजिबात नव्हे कि इतर संस्था किंवा रुग्णालये आणि तेथील तज्ज्ञ हे कुठेही कमी आहेत)

३) आम्ही कोणतेही कर्मकांड केले नाही याचा अर्थ असा अजिबात नव्हे कि ज्याचा विश्वास आहे त्याने तसे करूच नये. कारण अशा गोष्टींनी एखाद्या माणसाला मानसिक समाधान किंवा आत्मिक बळ मिळत असेल तर त्याने जरूर करावे ( आमच्या आईच्याच भाषेत - कुणाच्या कोंबड्याने का होईना उजाडल्याशी कारण)

४) डॉक्टर आहे म्हणून त्याला ताण तणाव येत नाही असे नाही. मी स्वत: किती धीर धरला असला तरी प्रत्यक्षात जेंव्हा हा कर्करोग ANAPLASTIC CARCINOMA OF THYROID (ATC) नसून MEDULLARY CARCINOMA OF THYROID (MTC) असा आला तेंव्हा माझ्या बायकोच्या दवाखान्यात माझा बांध फुटला आणि मी अक्षरशः तिच्या खांद्यावर डोकं ठेवून हमसून रडलो. कारण जर तो ANAPLASTIC CARCINOMA OF THYROID (ATC) असला पुढच्या वर्षी २०२० साली आपली आई आपल्याला दिसेल कि नाही याची मला खात्री नव्हती.
२००४ साली बायकोचा दवाखाना चालू केला तेंव्हा पासून आईचे घर वरच्याच मजल्यावर आहे त्यामुळे केंव्हाही तेथे जाणे सहज होत असे आणि आपले आईवडील तेथे आहेतच या अस्तित्वाची जाणीव आता जास्त प्रकर्षाने झाली.

एखाद्या माणसाची किंवा गोष्टीची किंमत आपल्याला केंव्हा होते तर ती वस्तू आपल्याकडे नसते तेंव्हा किंवा ती आपल्यापासून दूर गेली तर

शेवटी डॉक्टर हा सुद्धा माणूसच असतो आणि आपल्या भावनां वर किती संयम ठेवला तरी आतून वस्तुस्थिती माहिती असते.

मला जसे सुचत गेले तसे लिहीत गेलो. यात किती लेख येतील, काय असेल याची कोणतीही रूपरेषा माझ्या मनात नव्हती. त्यामुळे हे लेख विस्कळीत किंवा तुटक तुटक वाटण्याची शक्यता आहे.

शेवटी मिपा वरील इतक्या लोकांच्या मनातील प्रेम आणि सदिच्छा पाहून मी आपल्या सर्वांपुढे नतमस्तक आहे आणि आपल्या सर्वांचे आमच्या कुटुंबाकडून मन:पूर्वक आभार.

मुक्तकप्रकटन

प्रतिक्रिया

सुबोध खरे's picture

2 Aug 2019 - 9:21 pm | सुबोध खरे

हा कर्करोग (MTC) केमोथेरपी आणि रेडिएशन ला तेवढा प्रतिसाद देत नाही त्यामुळे शल्यक्रिया हाच सर्वात उत्तम पर्याय आहे. त्यामुळे तोफखान्याच्या तत्वाप्रमाणे HIT FIRST, HIT HARD, KEEP HITTING शल्यक्रिया जितकी उत्तम केली जाईल तितका रोगावर ताबा जास्त चांगला मिळतो.

डॉ सुहास म्हात्रे's picture

2 Aug 2019 - 7:33 pm | डॉ सुहास म्हात्रे

शस्त्रक्रिया कोणत्याही गुंतागुंत न होता यशस्वी झाली आणि मातोश्रींना "अति दक्षता विभागातून तिच्यासाठी खास खोलीत (स्पेशल रुम) आणण्यात आले" हे वाचून खूप आनंद झाला.

त्यांची मनोवृत्ती पाहता, प्रकृती लवकर सुधारून त्या आपली नित्यकर्मे पूर्वीच्याच उत्साहाने करू लागतील, याची खात्री आहे. ते लवकरात लवकर व्हावे हीच सदिच्छा !

बाप्पू's picture

2 Aug 2019 - 8:08 pm | बाप्पू

तुमचे प्रयत्न आणि आम्हा सगळ्यांच्या प्रार्थना शेवटी फळाला आल्या..
खरे सर, तुम्ही ज्या पद्धतीने या संकटाला सामोरे गेलात ते खरंच ग्रेट आहे..

फार लिहत नाही, पण वाचून बरे वाटले.
,पहिल्यापासून वाचा होतो पण काय लिहुबते काळात नव्हते.

सदिच्छा!

उगा काहितरीच's picture

2 Aug 2019 - 10:14 pm | उगा काहितरीच

डॉक्टरसाहेब,

आपल्या मातोश्री लवकरात लवकर हिंडू-फिरू शकाव्यात, त्यांचं थ्रोबॉल लवकरच चालू व्हावं या शुभेच्छा.

नाखु's picture

2 Aug 2019 - 10:37 pm | नाखु

सकारात्मक विचार करण्याचे बाळकडू, डॉ क आपल्याला माता पिता यांच्याकडून मिळाले आणि त्यात तुम्ही संयमाची भर घातलीय हे फार महत्त्वाचे.

उत्तम आरोग्यासाठी शुभेच्छा.

वाचकांची पत्रेवाला नाखु

मुक्त विहारि's picture

3 Aug 2019 - 1:55 am | मुक्त विहारि

+1

ट्रेड मार्क's picture

3 Aug 2019 - 4:39 am | ट्रेड मार्क

शस्त्रक्रिया यशस्वी झाली आणि प्रकृती झपाट्याने सुधारत आहे ही चांगली बातमी आहे. तुम्हाला किती हायसं वाटलं असेल याची कल्पना आहे.

मातोश्रींची सकारात्मक वृत्ती आणि तुम्हा सगळ्यांचे पाठबळ यामुळे त्या पुढचे आयुष्य आनंदात आणि निरोगी जगतील.

तुम्हा सर्वांच्या सकारात्मक वृत्तीचे खूप कौतुक आहे. सर्व काही ठीक होतेय हे उत्तम.

तुषार काळभोर's picture

3 Aug 2019 - 7:45 am | तुषार काळभोर

अतिशय सकारात्मक वृत्ती, तुम्हा सर्वांची स्थिर व तारतम्य असणारी विचारक्षमता, "टाटा" सारखी संस्था आणि तेथील हजारो रुग्णांचा अनुभव असलेले तज्ञ डॉक्टर...

हा सगळा घटनाक्रम सुरू असताना तो मिपावर मांडणं हे तुमच्या मिपावरच्या लोभाचं द्योतक आहे.

धन्यवाद डॉक्टर! शुभेच्छा!

नंदन's picture

4 Aug 2019 - 5:55 am | नंदन

तुम्हा सर्वांच्या सकारात्मक वृत्तीचे खूप कौतुक आहे. सर्व काही ठीक होतेय हे उत्तम.

असेच म्हणतो.

वकील साहेब's picture

3 Aug 2019 - 8:18 am | वकील साहेब

विळखा चे सर्व भाग वाचत होतो. पण प्रतिक्रिया देण्याचे धारिष्ट्य होत नव्हते. इतक्या मानसिक कल्लोळातही तुम्ही हे सर्व लिहू शकलात. हे खरोखर कौतुकास्पद आहे.

जगप्रवासी's picture

3 Aug 2019 - 12:19 pm | जगप्रवासी

वाचताना आमच्यावर इतका ताण येत होता तर तुम्ही किती सहन केलं असेल. आईंच्या निर्धास्त वृत्तीचे आणि तुमच्या सकारात्मक विचारांचे खरंच कौतुक.

प्रमोद देर्देकर's picture

3 Aug 2019 - 9:12 am | प्रमोद देर्देकर

ज्याचा शेवट गोड ते सर्वच गोड.
आईंना शुभेच्छा.
पण आता गाडी पूर्वपदावर येण्यास किती दिवस लागतील. म्हणजे रोजच्याप्रमाणे हिंडणे फिरणे यासाठी शस्त्रक्रिया नंतर घरी काय काळजी घ्यावी यासाठी अजून एक शेवटचा 6वा लेख येवू द्या.

म्हणजे तो आम्हा सगळ्यांना उपयोगी पडेल.

गड्डा झब्बू's picture

3 Aug 2019 - 12:34 pm | गड्डा झब्बू

एखाद्या माणसाची किंवा गोष्टीची किंमत आपल्याला केंव्हा होते तर ती वस्तू आपल्याकडे नसते तेंव्हा किंवा ती आपल्यापासून दूर गेली तर

+१
तुमच्या आईची प्रकृती लवकरात लवकर सुधारो ही परमेश्वर चरणी प्रार्थना __/\__

राघव's picture

6 Aug 2019 - 10:37 pm | राघव

असेच म्हणतो. _/\_

__/\__

आता फुरसतीने उपसंहार देखील येऊ देत.
अशा केसेस मधे खर्चाचा ताळेबंद कसा करावा, कुठल्या प्रकारचे मेडीकल इन्शुरन्स वयाच्या कितव्या वर्षी घ्यावे, काहिही होत नसताना देखील कुठल्या चाचण्या नियमीतपणे कराव्या (मला वाटतं याबद्दल तुम्ही टंकलय अगोदर...) इत्यादी माहितीचं संकलन झालं तर एका वाचनखुणेची अ‍ॅडीशन होईल आमच्या खात्यात.

दादा कोंडके's picture

4 Aug 2019 - 2:14 pm | दादा कोंडके

चला बरं झालं. तुमच्या आईंना उत्तम आरोग्य आणि दिर्घायुष्य लाभो!

सुधीर कांदळकर's picture

4 Aug 2019 - 6:06 pm | सुधीर कांदळकर

अल्पांशाने का होईना, फेडण्याची तुम्हाला संधी मिळाली आणि आपण ते फेडलेत. अभिनंदन.

सोबत वाचकांचे शिक्षण झाले.

धन्यवाद.

सुधीर कांदळकर's picture

4 Aug 2019 - 6:08 pm | सुधीर कांदळकर

अल्पांशाने का होईना, फेडण्याची तुम्हाला संधी मिळाली आणि आपण ते फेडलेत. अभिनंदन.

कमीत कमी साईड इफेक्ट्स आणि दीर्घायुरोग्यासाठी शुभेच्छा

सोबत वाचकांचे शिक्षण झाले.

धन्यवाद.

लई भारी's picture

6 Aug 2019 - 8:22 pm | लई भारी

आपण एवढ्या कठीण परिस्थितीत मिपाकरांसाठी हे लिहिलंत यात तुमचा मिपावरचा लोभ दिसतो.
आपल्या मातोश्रींचे नियमित रुटीन लवकर परत सुरु होवो ही सदिच्छा!

विजुभाऊ's picture

7 Aug 2019 - 11:12 am | विजुभाऊ

एक चाम्गली लेखमाला

प्रभो's picture

7 Aug 2019 - 11:54 am | प्रभो

आईंना शुभेच्छा!

त्या लवकर हिंडूफिरु लागोत ही सदिच्छा.
एवढ्या ताणतणावात असताना तुम्ही मला मदत केलीत याबद्दलही धन्यवाद.

राघवेंद्र's picture

14 Aug 2019 - 4:36 pm | राघवेंद्र

तुम्ही मिपावर लिहिल्यामुळे खूप जणांना अश्या वेळेस कसे वागायचे हे कळले .
मातोश्रीना शुभेच्छा !!!